Viðbótarlífeyrissparnaður

Auk þess að greiða skyldubundin iðgjöld til lífeyrissjóðs er einnig hægt að leggja til hliðar í svokallaðann viðbótarlífeyrissparnað.

Þeir aðilar sem geta boðið upp á viðbótarlífeyrissparnað eru:

• Lífeyrissjóðir
• Bankar og sparisjóðir
• Verðbréfafyrirtæki
• Líftryggingafélög

Einstaklingur hefur val um til hvaða ofangreindra aðila hann snýr sér varðandi vörslu viðbótarlífeyrissparnaðar.

Hefja má töku viðbótarlífeyris við 60 ára aldur, eða vegna örorku eða við andlát. Við andlát er sparnaðurinn greiddur til erfingja. Aukinn lífeyrissparnaður opnar þannig möguleika fyrir sveigjanlegri starfslok en almennt tíðkast og auðveldar mönnum einnig að draga úr vinnu.

Launþegar og sjálfstæðir atvinnurekendur geta nú greitt allt að 4% af heildarlaunum sínum sem viðbótariðgjöld til lífeyrissparnaðar og njóta skattfrelsis. Við þetta bætist allt að 2% frá vinnuveitanda.

Lífeyrissparnaður er sérstaklega góður sparnaðarkostur vegna mótframlags launagreiðanda sem bætist við árlega ávöxtun. Ef einstaklingur leggur fyrir 4% af launum og fær hann til viðbótar 2% sem mótframlag launagreiðanda, þá bætast við 200 krónur fyrir hverja 400 krónur sem hann leggur fram. Samtals er því greitt 600 krónur. Þessu til viðbótar fær viðkomandi skattafslátt sem fer eftir þeim skatthlutföllum sem gilda hverju sinni. Viðbótarlífeyrissparnaður er í raun peningaleg eign sem greiðist til baka með vöxtum að frádregnum staðgreiðslu skatta.

Sjá nánari útreikninga með reiknivélinni